კალცონე

იტალიური სამზარეულო, უპირველეს ყოვლისა, ასოცირდება პასტასთან და პიცასთან ყველა შესაძლო ვარიაციით. დღეს გიამბობთ, თუ როგორ უნდა მოვამზადოთ დახურული პიცა.

ნახევარმთვარის ფორმის დახურულ პიცას იტალიის ცენტრალურ და სამხრეთ რეგიონებში შეხვდებით. იტალიურ ენაზე დახურული პიცა ჟღერს როგორც "calzone" (კალცონე), რაც ითარგმნება როგორც "კონვერტი შიგთავსით".

შიგთავსისთვის შეიძლება გამოიყენოთ რამდენიმე სახეობის ყველი, ლორი, სალამი, ქათამი, ბოსტნეული ან სოკო. შიგთავსი არ უნდა იყოს ძალიან ბევრი, საკმარისია რბილი ყველი და წვნიანი პომიდორი.

როგორც წესი, დიდი პიცა მზადდება ერთი — ყველასთვის. აი, დახურული პიცა და მისი მთელი შიგთავსი კი, წესის თანახმად, განკუთვნილია ერთი ადამიანისთვის. ცომი არაფრით განსხვავდება, იგივეა, რაც ჩვეულებრივი პიცისთვის. სცადეთ, ეს ძალიან წვნიანი და გემრიელია!

მზა გამომცხვარი კერძის წაღება შეგიძლიათ თან წასახემსებლად პიკნიკზე ან სამსახურში, ან შეგიძლიათ შეინახოთ საკვების კონტეინერში მაცივარში 3 დღემდე, ან გაყინოთ ჰერმეტულ პაკეტებში და შეინახოთ საყინულეში 3 თვემდე.

ინგრედიენტები

• პომიდორი 1 ცალი
• ყველი (ნებისმიერი, რომელიც კარგად დნება) 120 გრამი
• ფქვილი 200 გრამი
• ტომატის სოუსი 60 გრამი
• ძეხვი (ნებისმიერი, რომელიც მოგწონთ) 60 გრამი
• მარილი 1 ჩაის კოვზი
• შაქარი 1/2 ჩაის კოვზი
• მცენარეული ზეთი 1 სუფრის კოვზი
• საფუარი 1 და 1/4 ჩაის კოვზი
• წყალი 125 მლ

დამზადება

1. მოამზადეთ ყველა ინგრედიენტი სიის მიხედვით. შიგთავსი შეგიძლიათ აიღოთ ნებისმიერი, თქვენი გემოვნებით.
2. ღრმა თასში შეურიეთ თბილი წყალი, შაქარი და საფუარი. დატოვეთ 10-15 წუთით, სანამ ზემოდან არ გაჩნდება დამახასიათებელი "ქუდი".
3. შემდეგ დაამატეთ ფქვილი და მოურიეთ.
4. ჩაასხით 1 სუფრის კოვზი მცენარეული ზეთი.
5. ხელით მოზილეთ რბილი და ოდნავ წებოვანი ცომი. შეკარით ბურთად, წაუსვით მცენარეული ზეთი, დააფარეთ თასს პირსახოცი და დატოვეთ თბილ ადგილას 1–1,5 საათით. ცომი ზომაში 2-ჯერ უნდა გაიზარდოს.
6. საცხობ ქაღალდს ან სპეციალურ კულინარულ ხალიჩას მოაყარეთ ფქვილი. ამოსული ცომი გაყავით ორ ნაწილად. თითოეული ნაწილი გააბრტყელეთ წრის ფორმით, რაც უფრო თხლად გააბრტყელებთ, მით უფრო თხელი გამოვა პიცა. ჩანგლით დაჩხვლიტეთ ცომის მთელ ზედაპირზე. წრის ერთი ნახევარი წაუსვით სოუსით, დატოვეთ ცოტა ადგილი კიდეებზე.
7. სოუსს მოაყარეთ გახეხილი ყველის ნაწილი. გამოდგება ნებისმიერი, რომელიც კარგად დნება; მე დღეს სულგუნი მაქვს.
8. ყველზე დაალაგეთ თხელ ნაჭრებად დაჭრილი ძეხვი.
9. ზემოდან დავამატე ნაჭრებად დაჭრილი პომიდორი. ასევე შეიძლება სოკოს, ბულგარული წიწაკის და ა.შ. დამატება.
10. შიგთავსს მოაყარეთ დარჩენილი ყველი.
11. შიგთავსს დააფარეთ ცომის მეორე ნახევარი და კარგად შეკარით კიდეები ნებისმიერი მოსახერხებელი გზით. ანალოგიურად მოამზადეთ დახურული პიცა ცომის მეორე ნაწილისგან. ცომის ზედაპირი შეგიძლიათ წაუსვათ კვერცხის გულით, მცენარეული ზეთით ან მცირე რაოდენობით ტომატის სოუსით.
12. აცხვეთ 230-250 C - მდე გახურებულ ღუმელში დაახლოებით 7-10 წუთის განმავლობაში. დახურული პიცა მზად არის.
13. გემრიელად მიირთვით!