წიწიბურას პური

ეს ძალიან ხრაშუნა ქერქი, მოხალული წიწიბურას მიკრო-ნაწილაკებით... უნაზესი გული, ისეთი ნაცნობი არომატითა და გემოთი) მასზე თუ კარაქს გადაუსვამთ, გეგონებათ, რომ ყველაზე ჰაეროვან, ფუმფულა და ხრაშუნა წიწიბურას ფაფას მიირთმევთ კარაქით) ზედმეტი ნაჭრისგან თავის შეკავება უბრალოდ შეუძლებელია) მზადდება ერთი, ორი, სამი! დიდხანს არ ხმება. მაგრამ ვინ დააცდის ამდენ ხანს გაჩერებას?)))

გემო: აქვს სპეციფიკური, თხილისებრი არომატი. მწვანე წიწიბურასგან დამზადებული პური უფრო ნაზია, ვიდრე მოხალული (ყავისფერი) წიწიბურასგან მიღებული.

ტექსტურა: გამოდის საკმაოდ მკვრივი და ნოტიო. ის არ ჰგავს ჰაეროვან თეთრ პურს, უფრო "პურისებრი" ხდება ფსილიუმის ან ფერმენტაციის დამატებით.

ფერი: მწვანე წიწიბურას პური ღია ნაცრისფერი ან ზეთისხილისფერია, ხოლო ალაოს (სოლოდის) დამატებით იღებს კლასიკური შავი პურის ფერს.

ინგრედიენტები

• წიწიბურას ბურღული: 130 გ
• ფქვილი (ხორბლის): 260 გ
• წყალი: 300 მლ
• საფუარი (მშრალი): 1,5 ჩაის კოვზი
• მარილი (ჩვეულებრივი, მსხვილი): 1,5 ჩაის კოვზი
• შაქარი: 1 სუფრის კოვზი
• მცენარეული ზეთი: 3 სუფრის კოვზი (ავტორი გვირჩევს: 1 კოვზი არომატული მზესუმზირის ზეთი და 2 კოვზი ნებისმიერი უსუნო მცენარეული ზეთი).

დამზადება

1. მომზადება და აწონვა: ყველა პროდუქტი აწონეთ სასწორით. პურის ცხობისას სიზუსტე წარმატების გარანტიაა. არ დაგავიწყდეთ ჭურჭლის (ტარის) წონის გათვალისწინება.
2. წიწიბურას მოხალვა: მოხალეთ წიწიბურა მშრალ ტაფაზე იქამდე, სანამ არ იგრძნობთ მოხალული წიწიბურას „თავბრუდამხვევ“ არომატს. გადმოდგით ტაფიდან თეფშზე და სრულად გააგრილეთ.
3. საფუარის გააქტიურება: სანამ წიწიბურა გრილდება, შეათბეთ წყალი 35-40 გრადუსამდე (ხელით უნდა გრძნობდეთ სასიამოვნო სითბოს). გახსენით მასში შაქარი, დაამატეთ საფუარი, მოურიეთ და დატოვეთ 7 წუთით, რომ საფუარი ამუშავდეს.
4. დაფქვა და შერევა: დაფქვით გაციებული წიწიბურა (ყავის საფქვავში ჯობია ორ პარტიად). მთავარია: არ აქციოთ ის ერთგვაროვან ფქვილად; დატოვეთ ძალიან წვრილი კოშტები (მიკრო-ნაწილაკები) — ეს პურს განსაკუთრებულ სტრუქტურას მისცემს. დიდ ჯამში ჩაიცერით ხორბლის ფქვილი, დაამატეთ მარილი და დაფქული წიწიბურა. კარგად აურიეთ.
5. ცომის მოზელვა: მშრალ ნარევს დაამატეთ საფუარიანი წყალი და მცენარეული ზეთი. კარგად მოზილეთ. თუ ხელით ზელთ, ხელებზე ზეთი წაისვით. მოზილეთ დიდხანს და სიყვარულით — რაც უკეთ მოიზილება, მით უკეთესი გამოვა პური. შეკვარეთ გუნდა, ჩადეთ დაზეთილ ჯამში, გადააფარეთ სამზარეულოს პარკი და დადგით თბილ ადგილას 1 საათით.
6. ფორმირება: აფუებული ცომი გადმოიტანეთ ფქვილიან ზედაპირზე. ხელით გააბრტყელეთ მართკუთხედად (რომ ზედმეტი აირები გამოვიდეს). გადაკეცეთ ცომი „კონვერტივით“: ჯერ გვერდები შემოუკეცეთ ცენტრისკენ, შემდეგ ზემოდან ქვემოთ, თითქოს „საყელოს“ უკეთებთ. ბოლოს შეკვარეთ მოგრძო ფორმა (ვაენიკივით) და ნაკერით ქვემოთ მოათავსეთ საცხობ ფირფიტაზე.
7. დასვენება და დასერვა: ზემოდან მოაყარეთ ცოტა ფქვილი და ბასრი დანით გაუკეთეთ ირიბი დასერვები (სილამაზისთვის). დააფარეთ ტილო და დატოვეთ კიდევ 30 წუთი ამოსასვლელად.
8. გამოცხობა (ორთქლის ეფექტით): გაახურეთ ღუმელი 200 გრადუსამდე. ღუმელის კუთხეში შედგით წყლიანი ჭურჭელი — ორთქლი პურს საოცარ ხრაშუნა ქერქს გაუკეთებს.
9. აცხვეთ 25 წუთი 200 გრადუსზე (ღუმელი არ გამოაღოთ!).
10. შემდეგ დაუწიეთ ტემპერატურას 180 გრადუსამდე, პურს ზემოდან გადააფარეთ ფოლგა (პრიალა მხარით ზემოთ) და აცხვეთ კიდევ 15-20 წუთი.
11. მზადყოფნის შემოწმება: გამოიღეთ პური და თითებით დაუკაკუნეთ ძირზე. თუ ყრუ, ცარიელი ხმა ისმის — პური მზადაა! დადეთ ცხაურზე გასაგრილებლად.