სოუსი რომესკოს

სოუსი რომესკო ესპანეთის ერთ-ერთ მხარეში — კატალონიაში გამოიგონეს. ტკბილი წითელი წიწაკის ბაზაზე მომზადებული ამ გემრიელი და არომატული სოუსის უამრავი რეცეპტი არსებობს. მე გთავაზობთ ერთ-ერთ მათგანს.

შეიძლება ითქვას, რომ სოუსი „რომესკო“ უნივერსალურია, რადგან ის თითქმის ყველა კერძს უხდება. მიირთვით ახალმომზადებული სოუსი შემწვარ ან გამომცხვარ თევზთან, ფრინველის ხორცთან, ბოსტნეულსა თუ ხორცთან ერთად. ის ასევე შესანიშნავად შეავსებს ზღვის პროდუქტების გემოს, შეგიძლიათ უბრალოდ პურზე ან ტოსტზეც გადაუსვათ. გემრიელად მიირთვით!

ესპანეთში ამ სოუსს ამზადებენ გარკვეული ჯიშის ტკბილი წითელი წიწაკისგან, რომელსაც ბუნებრივი გზით აშრობენ. ჩვენთან კი მისი ჩანაცვლება შესაძლებელია მწიფე ტკბილი წითელი წიწაკით (ბულგარულით), თუ მას ამ რეცეპტში აღწერილი წესით მოამზადებთ, ან შეგიძლიათ სუპერმარკეტში დაკონსერვებული გამომშრალი წიწაკა შეიძინოთ.

ინგრედიენტები

• ტკბილი წითელი წიწაკა (ბულგარული): 2 ცალი
• პამიდორი: 1 ცალი (დიდი ზომის)
• თხილი: 70 გრამი
• ნიორი: 2 კბილი
• ღვინის ძმარი: 1 ჩაის კოვზი
• ზეითუნის ზეთი: 2 სუფრის კოვზი
• დაფქული პაპრიკა: 1,5 ჩაის კოვზი
• კაიენის წიწაკა (ცხარე): 1/4 ჩაის კოვზი
• მარილი: გემოვნებით

დამზადება

1. ტკბილი წითელი წიწაკა გამოაცხვეთ 200 გრადუსზე გახურებულ ღუმელში ან გრილზე. გამოცხობის შემდეგ გაასუფთავეთ თესლისა და კანისგან.
2. თხილი კარგად გარეცხეთ გამდინარე წყალში და დაელოდეთ წყლის დაწრეტას. გამოაშრეთ თხილი ტაფაზე ყველაზე დაბალ ტემპერატურაზე, მუდმივი რევით, დაახლოებით 7–10 წუთის განმავლობაში. როდესაც თხილი გამოშრება, მოაცილეთ კანი – ამისათვის გადმოიტანეთ თხილი ტილოზე და ინტენსიურად გაუსვით ხელები (გააფხვიერეთ).
3. პამიდორი გარეცხეთ, გაამშრალეთ და გამოაცხვეთ 200 გრადუსზე გახურებულ ღუმელში (პერგამენტიან ლანგარზე) დაახლოებით 1,5-2 წუთი თითოეულ მხარეს. გამომცხვარ პამიდორს ფრთხილად მოაცილეთ კანი, გაჭერით შუაზე და ამოაცალეთ თესლი.
4. ნიორი გაასუფთავეთ, გარეცხეთ და ბასრი დანით რაც შეიძლება წვრილად დაჭერით. ასევე შეგიძლიათ გამოიყენოთ ნივრის საჭყლეტი.
5. ბლენდერის ჯამში მოათავსეთ მომზადებული წითელი წიწაკა, თხილი, პამიდორი და ნიორი. დაამატეთ ზეითუნის ზეთი, ღვინის ძმარი, სუნელები და მარილი.
6. ყველა კომპონენტი ათქვიფეთ ბლენდერის მაქსიმალურ სიჩქარეზე ერთგვაროვანი, ფაფისებური კონსისტენციის მიღებამდე. გასინჯეთ სოუსი და საჭიროების შემთხვევაში დაამატეთ მარილი, ძმარი ან სუნელები. სოუსი „რომესკო“ მზად არის!